ಆಮೆನ್‌

ಇದು ಸಂಸ್ಕೃತದ 'ತಥಾಸ್ತು' ಎಂಬ ಪದದ ಬಳಕೆಯನ್ನು ಹೋಲುವ ಆಂಗ್ಲ ಮತ್ತು ಗ್ರೀಕ್‌ ಭಾಷೆಯ ಲಿಪ್ಯಂತರ ಪದ. ಮೂಲತಃ ಇದು ಹೀಬ್ರೂ ಭಾಷೆಯ ದೃಢೀಕರಣದ ಒಂದು ಘೋಷಣಾ ಪದ. ಸಾಮಾನ್ಯವಾಗಿ 'ಹಾಗೆಯೇ ಆಗಲಿ' ^೧ ಅಥವಾ 'ಖಂಡಿತವಾಗಿಯೂ' ^೨ ಎಂಬ ಅರ್ಥಗಳನ್ನು ಈ ಪದವು ಸೂಚಿಸುತ್ತದೆ. ಈ ಪದ ಬಳಕೆಯನ್ನು ಹೀಬ್ರೂ ಕ್ಯಾನೋನ್‌(ಹಳೆಯ ಒಡಂಬಡಿಕೆ) ಮತ್ತು ಹೊಸ ಒಡಂಬಡಿಕೆಗಳಲ್ಲೂ ಕಾಣಬಹುದಾಗಿದೆ.

ಹೀಬ್ರೂ ಜನಾಂಗವು ದಿನನಿತ್ಯದ ಪ್ರಾರ್ಥನೆಯ ವೇಳೆಯಲ್ಲಿ ಅಥವಾ ಸರ್ವೇಶ್ವರನನ್ನು ಕೀರ್ತಿಸಿ ಹಾಡುವಾಗ ಅಂತ್ಯದಲ್ಲಿ ಈ ಪದವನ್ನು ಬಳಸುತ್ತಾರೆ. ಈ ಪದಗಳ ಬಳಕೆಯನ್ನು ಪ್ರಾರ್ಥನೆ^೩ ಅಥವಾ ಕೀರ್ತನೆಗಳ^೪ ಅಂತ್ಯದಲ್ಲಿ ಬಳಸಿರುವುದನ್ನು 'ಹಳೆಯ ಒಡಂಬಡಿಕೆ'ಯ ಪೂರ್ವ ಕಾಲದ ಇತಿಹಾಸ ಮತ್ತು ಕೀರ್ತನೆಯ ಗ್ರಂಥಗಳಲ್ಲಿ  ಕಾಣಬಹುದು. ಇದನ್ನು 'ಸ್ತುತಿಯ ಪದ'^೫ವಾಗಿಯೂ ಕೆಲವೆಡೆಗಳಲ್ಲಿ ಬಳಸಿರುವುದನ್ನು ಕಾಣಬಹುದು.

ಹೊಸ ಒಡಂಬಡಿಕೆಯ 'ಪ್ರಕಟಣೆ'ಯಲ್ಲಿ ಯೇಸು^೬ವನ್ನು ಈ ಪದವು ಪ್ರತಿನಿಧಿಸುತ್ತದೆ. ಅಂತೆಯೇ ಸ್ವರ್ಗೀಯ ಘಟನೆಯಲ್ಲಿ ಸೃಷ್ಟಿಗಳು ಯಜ್ಞದ ಕುರಿಮರಿಯನ್ನು ಹಾಡಿ ಸ್ತುತಿಸಿದ ಬಳಿಕ ಅಲ್ಲಿದ್ದ ನಾಲ್ಕು ಜೀವಿಗಳು ಹಾಗೂ ಇನ್ನೊಂದೆಡೆ ನಾಲ್ಕು ಜೀವಿಗಳ ಜೊತೆಗೆ ಅಲ್ಲಿದ್ದ ಸಭಾಸದರು 'ಅಮೆನ್‌'^೭ ಎಂದು ಹೇಳಿದರು ಎಂಬುದಾಗಿ ಪ್ರಕಟಣೆಯಲ್ಲಿ ಉಲ್ಲೇಖವಿದೆ. ಸಂತ ಪೌಲನು 'ದೇವರ ತಥಾಸ್ತು' ಎಂಬುದಾಗಿ ಈ ಪದ ಬಳಕೆಯನ್ನು ಮಾಡಿರುವುದು ಕೊರಿಂತಿಯರಿಗೆ ಬರೆದ ದ್ವಿತೀಯ ಪತ್ರ^೮ದಲ್ಲಿ ಕಾಣಬಹುದು. ಈ ಪದದ ಬಳಕೆಯನ್ನು ಹೊಸ ಒಡಂಬಡಿಕೆಯಲ್ಲಿ; ವಿಶೇಷವಾಗಿ ಸಂತ ಪೌಲ(ಒಮ್ಮೆ ಪೇತ್ರ)ನು ಬರೆದ ಪತ್ರಗಳಲ್ಲಿ 'ಸ್ತುತಿ ಪದ'^೯ವನ್ನಾಗಿಯೂ ಬಳಸಲ್ಪಟ್ಟಿರುವುದು ಕಂಡುಬರುತ್ತದೆ. 
ಇಸ್ಲಾಂ ಮತದಲ್ಲಿಯೂ ಈ ಪದ(ಆಮಿನ್‌) ಬಳಕೆಯಲ್ಲಿದೆ.

ಉಲ್ಲೇಖ:

೧. ಸಂಖ್ಯಾ.5:22; 1ಅರಸು.1:36; ಯೆರೆ.11:5; 

೨. ಧರ್ಮೋ.27:15-26; 
೩. 1ಪೂರ್ವ.16:36; 
೪.  ಕೀರ್ತ.41:13, 72:19, 89:52, 106:48; 
೫.  ನೆಹೆ.8:6; 
೬. ಯೊ.ಪ್ರ.3:14; 
೭. ಯೊ.ಪ್ರ.5:14, 7:10-12; 
೮. ಕೊರಿಂ.1:19; 
೯. ರೋಮ.1:25; 16:27, ಎಫೆ. 3:21, 1ಪೇತ್ರ 4:11

ಮುಖಪುಟ